Naibu Katibu Mkuu Wizara ya Elimu, Sayansi na Teknolojia Prof. James Mdoe amewataka Walimu kuwa mstari wa mbele katika kuhamasisha wanafunzi na kuwafundisha kwa weledi mkubwa, ili kulisaidia taifa kupata Wataalam wakutosha katika nyanja za Uhandisi, Sayansi na Teknolojia.
Prof. Mdoe ametoa rai hiyo, wakati akifunga Mafunzo ya Walimu wa Sayansi na Hisabati mkoani Arusha, yaliyiratibiwa na mradi wa SEQUIP.
Mdoe amesema serikali inahitaji kujenga na kuimarisha uchumi imara, na kupitia mafunzo hayo inatarajia matokeo chanya kutoka kwa walimu na umahiri katika ufundishaji na Ujifunzaji.
“Lengo la mafunzo kwenye mradi wetu huu ni kuongeza umahiri wa ufundishaji wa masomo haya, ili kuweza kutoa matokeo chanya, na huko tuendako kuna ushindani zaidi, tunahitaji Wanasayansi mahiri, wabunifu na ambao wanaweza kukabiliana na mabadiliko ya kidigitali katika ulimwengu wa sasa.
” hatuwezi kujenga uchumi imara bila kuwa na Wanasayansi, hawa watasaidia katika sekta mbalimbali za kiuchumi, na maendeleo” alisema Prof. Mdoe.
Akizungumza kuhusu Mapinduzi ya Nne ya Viwanda, amebainisha kuwa hayo ni Mapinduzi ya kidigitali, hivyo amewasisitiza Walimu kutumia fursa mbalimbali zitakazowawezesha kwenda sambamba na mabadiliko hayo, sanjari na kuwa na mtazamo chanya kutumia Tehema katika ufundishaji.
Ameongeza kuwa serikali kupitia mradi wa SEQUIP Serikali inatarajia kujenga Shule mpya za Sekondari 1,000 katika kata ambazo hazina Shule na maeneo ambayo yana wanafunzi wengi ukilinganisha na miundombinu iliyopo.
“Mwaka 2022/2023 serikali imejenga Shule mpya 232 pia fedha zimetengwa kwa ajili ya ujenzi wa Shule nyingine 214. Wakati huo huo serikali inaendelea na ujenzi wa Shule mpya 26 za Sekondari za Kitaifa za Wasichana kila mkoa, ambapo ujenzi wa Shule 10 upo hatua za umaliziaji na fedha kwa ajili ya ujenzi wa Shule 16 zimeshatumwa kuanza ujenzi” amebainisha Prof. Mdoe
Ameongeza kuwa serikali imekamilisha upanuzi wa shule kongwe 18 na tayari imetuma fedha kwa ajili ya upanuzi wa shule nyingine 6.
@ikulu_mawasiliano @ikulu_habari @maelezonews
#kaziiendelee
#tunaboreshaelimuyetu
