Home KITAIFA MAADHIMISHO YA MIAKA 62 YA UHURU KUFANYIKA KILELE CHA MLIMA KILIMANJARO

MAADHIMISHO YA MIAKA 62 YA UHURU KUFANYIKA KILELE CHA MLIMA KILIMANJARO

Katika Kuelekea maadhimisho ya miaka 62 ya uhuru wa Tanzania Bara, ambayo hufanyika disemba 9 ya kila mwaka Naibu Kamishna wa Uhifadhi na Maendeleo ya Biashara -TANAPA Herman Batiho, amesema shirika hilo kwa kushirikiana na makampuni ya waongoza watalii imepanga kuwapeleka watanzania katika kilele cha Mlima Kilimanjaro lengo ikiwa ni kutangaza utalii wa nchi na kutoa furusa kwa Watanzania kutembelea Mlima huo kupitia maadhimisho hayo

Akizungumza na waandishi wa wanahabari jjijini,Arusha leo tarehe 28.08.2023 Kamishna Batiho amesema, Jeshi la Wananchi wa Tanzania (JWTZ) limekuwa na utaratibu wa kuadhimisha sherehe za Uhuru wa Tanganyika tangu ulivyopatikana mwaka 1961. Maadhimisho haya yamekuwa yakifanyika kwa kupandisha bendera ya nchi yetu katika kilele cha Mlima Kilimanjaro. Tukio hili limekuwa likihusisha kikundi cha wanajeshi wachache wakishirikiana na askari wa Hifadhi za Taifa Tanzania kwa utaratibu wa kampuni ya utalii ya ZARA ambapo kwa kipindi cha miaka miwili iliyopita maadhimisho haya yalipata sura mpya ya ushiriki wa wananchi na kutambulika kwa jina la “Twenzetu Kileleni” ambapo kwa sasa ni msimu wa tatu.

Hata hivyo, Kamishna Batiho ameongeza kupitia hamasa kubwa na mwamko wa watanzania wengi katika kipindi hicho ambapo Shirika la Hifadhi za Taifa Tanzania limeongeza wigo kwa kushirikiana na mawakala wote wa utalii kuratibu kampeni za twenzetu kileleni kwa lengo la kuendelea kuhamasisha utalii wa ndani wakati wa maadhimisho ya Uhuru tarehe 9, Disemba. Lengo likiwa ni kuongeza wigo wa utangazaji wa njia nyingi za kupanda Mlima Kilimanjaro na fursa zaidi kwa watanzania kuchagua kampuni na njia wanazotaka kupanda mlima na sio njia ya Marangu tu kama ilivyozoeleka.

“Kati ya kampuni zote tulizozialika kushiriki katika uratibu wa maadhimisho haya ni kampuni tatu ndio zimejitokeza kushiriki kampeni hii katika msimu huu wa tatu. Kampuni hizo ni ZARA, African Zoom na African Scenic.” Amesema Kamishna Batiho.

Pamoja na hayo , kampuni ya ZARA TOURS itatumia njia ya Marangu kama ilivyozoeleka, African Zoom watatumia njia ya Machame na African Scenic watatumia njia ya Lemosho ambapo idadi ya siku za kupanda mlima huo ni 6 kwa njia ya Marangu, siku 7 kwa njia ya Machame na kwa Lemosho itakuwa siku 8 Gharama za kupanda mlima zitakuwa ni shillingi 1,150,000/- kwa njia ya Marangu, shillingi 1,400,000/- kwa njia ya Machame na 1,700,000/- kwa njia ya Lemosho aliongeza Kamishna Batiho.

Kamishna Msaidizi wa Uhifadhi ambaye ni Mkuu wa Hifadhi ya Taifa Kilimanjaro Angela Nyaki ametoa rai kwa watanzania wote kushiriki kuadhimisha sherehe hizo za uhuru katika kilele kirefu zaidi barani Afrika.

“Kama mwenyeji wa mlima niwakaribishe watanzania wa mikoa yote ya Tanzania Bara na Visiwani kuja kushiriki nasi katika sherehe hizi za Uhuru katika Paa la Afrika. Nina imani watanzania wengi wana shauku kubwa ya kushiriki haya maadhimisho, kwa kulipa kidogo kidogo na kwa wale watanzania wenzetu ambao wamewahi kupanda kwa njia ya marangu nitoe wito sasa tuhamie njia nyingine ili tuuone mlima wetu kwa upande mwingine pia” amesema Kamishna Nyaki.

Previous articleCHADEMA RUKWA WAKOSOA MKATABA WA BANDARI  
Next articleSAKATA LA ABIRIA KUPATA ADHA YA USAFIRI LAENDELEA MOROGORO LAFIKISHA SIKU 5,SERIKALI YAOMBWA KUINGILIA KATI

LEAVE A REPLY

Please enter your comment!
Please enter your name here